Eet vir volgehoue energie 2

Ná die wegholsukses van Eet vir volgehoue energie, Eet slim en bly slank en die South African GI Guide het Gabi Steenkamp en Liesbet Delport nou meer as 80 splinternuwe laevet-, lae-GI-resepte ontwikkel vir elke dag se lekker eet. Dié gesinsvriendelike resepte sluit lae-GI-weergawes in van immergewilde geregte soos Thaise hoenderkerrie, ontbytmuffins en selfs kaaskoek - en bewys dat gesonde kos ook smulkos kan wees.

Al meer mense ontdek deesdae die voordele van 'n lae-GI, laevet eetpatroon. Hierdie manier van eet verseker jou nie net van volgehoue energie, verbeterde konsentrasie en verhoogde stamina nie, maar hou ook die volgende spesifieke gesondheidsvoordele in:

Verlaagde en bestendige bloedglukosevlakke by diabete Makliker permanente gewigsverlies
Verbeterde konsentrasie by kinders met aandaggebreksindroom (AGS)
Beter prestasie onder sportmanne en -vroue
Verlaagde cholesterol en bloeddruk
Verligting van simptome van chroniese candidiase, polisistiese ovariale sindroom en ontstekingsiektes soos artritis

Die volledige inleiding verduidelik presies hoe die Glukemiese Indeks werk en verskaf praktiese riglyne vir lae-GI, laeveteetgewoontes vir spesifieke mediese toestande.

Die nuttige GI-koslyste is 'n onontbeerlike hulpmiddel om geskikte voedselsoorte en -produkte te identifiseer.