Gestoomde rys / Steamed Rice

250 mℓ rys
500 mℓ water
15 mℓ olie
5 mℓ sout

Spoel die rys af in ’n vergiettes.

Meng die rys met die res van die bestanddele in ’n souspan.
Verhit dit oor medium hitte tot die rys begin kook.
Stel die hitte nou op laag en prut tot die rys sag is – 15 tot 20 minute.

Verwyder van die hitte en laat dit vir 5 minute staan.
Roer dit om met ’n vurk en bedien.

Krapsous

Krapsous is veral geskik vir seekos.

25 mℓ mielieblom
30 mℓ water
15 mℓ olie
5 mℓ gerasperde gemmer
2 stingeluie, in stukkies gesny
5 mℓ droë sjerrie
’n klein blikkie krapvleis – ongeveer 165 g
310 mℓ hoenderaftreksel
60 mℓ melk

Meng die mielieblom en water in ’n bakkie en hou eenkant.

Verhit die olie in ’n souspan oor medium hitte.
Gooi die gemmer by en roer vir 10 sekondes.
Gooi die stingeluie, sjerrie en krapvleis by en roerbraai vir 1 minuut.
Gooi die aftreksel en melk by en bring tot kookpunt.
Roer die mielieblom-mengsel by die sous. Kook, terwyl jy aanhoudend roer tot die sous begin verdik.

(foto: Allerina & Glen MacLarty)

Lo Mein noedels met garnale

350 g noedels
10 mℓ sesamolie
125 mℓ gekapte grasuie
25 mℓ oestersous
25 mℓ sojasous
5 mℓ suiker
Knippie sout
Knippie varsgemaalde swartpeper
30 mℓ olie
5 mℓ gerasperde gemmer
1 knoffelhuisie, fyngedruk
250 g skoongemaakte garnale
15 mℓ droë sjerrie
200 g boontjiespruite

Kook die noedels volgens die aanwysings op die verpakking.
Dreineer, spoel af onder koue water en dreineer weer.
Meng die noedels met die sesamolie en hou eenkant.

Meng die oestersous, sojasous, suiker en sout en peper in ’n mengbakkie.

Verhit die olie in ’n wok of pan oor hoe hitte.
Roerbraai die knoffel en gemmer vir 10 sekondes.
Voeg die garnale by en roerbraai tot dit mooi pienk begin raak – omtrent 1 minuut lank.
Voeg die grasuie en sjerrie by en braai tot die grasuie begin verwelk – omtrent 15 sekondes lank.
Voeg die helfte van die boontjiespruite by en roerbraai vir 15 sekondes.
Voeg die res van die boontjiespruite by en roerbraai nog 15 sekondes.
Voeg die sous en noedels by en kook tot alles verhit is, terwyl jy aanhoudend roer. Dit sal omtrent 2 minute neem.

Die resep is genoeg vir 4 persone.

Idee: Gebruik gerus spaghetti indien jy dit verkies (sien foto).

Hoender chow mein

Maak jou gebraaide noedels vooraf klaar (klik hier vir die resep).

Hierdie hoender chow mein resep is genoeg vir 6 persone.

2 skoongemaakte hoenderborsies, in 2,5 cm blokkies gesny
225 g ontbeende varkvleis, in 2,5 cm blokkies gesny
15 mℓ mielieblom
40 mℓ droë sjerrie
30 mℓ sojasous
125 mℓ warm water
’n blokkie hoenderaftreksel
30 mℓ olie
2,5 cm vars gemmer, geskil en gerasper
1 knoffeltoontjie, fyngedruk
225 g skoongemaakte garnale
2 uie, in halwe ringe gesny
1 rooi soetrissie, in repies gesny
2 stokke seldery, in stukke van 2,5 cm gesny
100 g kool, fymgekap

Meng 5 mℓ mielieblom, 10 mℓ sjerrie en 10 mℓ sojasous in ’n groot mengbak.
Voeg die hoender en vark by en meng goed.
Plaas in die yskas vir 1 uur.

Meng die oorblywende mielieblom, sjerrie en sojasous met die water en hoenderblokkie.
Hou die sousie eenkant.

Verhit die olie in ’n wok of groot pan en braai die gemmer en knoffel daarin vir 1 minuut. Gooi die hoender en vark by en roerbraai tot dit nie meer pienk is in die middel nie. Dit neem omtrent 5 minute.
Voeg die garnale by en roerbraai tot dit mooi helderpienk raak – omtrent 3 minute.
Voeg die groente by en roerbraai vir 5 minute.
Gooi die sousie by. Kook en roer tot die sous begin borrel en verdik. Kook dan vir nog 1 minuut.

Bedien die chow mein nou op die noedels.

Gebraaide noedels

As jy Chinese kos wil maak, moet jy gebraaide noedels onder die knie kry.

Kook die noedels volgens die verpakking se aanwysings en dreineer.
Spoel dit af onder koue water en dreineer weer.
Pak ’n paar lae handdoekpapier bo-op ’n muffin pan en laat die noedels daarop lê en uitdroog vir 3 uur lank.

Verhit 5 cm olie in ’n wok.
Gebruik ’n gaatjieslepel of –tang en plaas klein porsies noedels in die warm olie.
Braai dit vir 30 sekondes.
Dreineer die noedels op handdoekpapier.

Chinese vispakkies

olie
4 stokvisfilette
2 cm vars gemmer, geskil en gerasper
8 knoffelhuisies, in fyn skywe gesny
2 cm rissies, ontpit en fyn opgesny
60 mℓ sojasous
2,5 mℓ sesamolie
2 pok choi, fyn opgesny
2 stingeluie, fyn opgesny
'n hand vol vars koljander, grof gekap
200 g gaar rys
4 stukke foelie, groot genoeg vir die vis

Voorverhit die oond tot 180°C.

Smeer die een kant van elke vel foelie met olie.
Plaas 'n fillet in die middel van elke vel. Buig die kante van elke vel na bo.
Verdeel die gemmer, knoffel, rissie en sojasous in vier en plas op elke stuk vis daarvan.
Vou die foelie toe en seel elke stuk vis in sy pakkie.
Bak vir ongeveer 20 minute – tot gaar.

Intussen braai jy die pok choi in die sesamolie vir 4 minute oor medium hitte.

Bedien die vis op rys, saam met die pok choi. Strooi die stingeluie en koljander oor voor jy dit bedien.

Chinese sesamegroente / Chinese Sesame Vegetables

Gebruik enige groente, maar sorg dat hulle almal min of meer ewe groot is.

2 tl sesame olie
1 tl grondboontjieolie
1 ui, gesny
2 knoffelhuisies, gesny
1 rissie, gesny
1 handvol gemengde groente, gesny
1 el droë sherrie
1 tl bruinsuiker
1 tl Maizena
1 handvol boontjiespruite en Sesame sade

Verhit die olie in ´n wok of in ´n pan. Voeg ui, knoffel en rissie by wanneer olie baie warm is. Roerbraai vir ´n paar sekondes en voeg dan die groente by. Kook die groente oor hoë hitte vir 2 min. Meng intussen die sherrie, soja, suiker en Maizena en voeg dit by die kokende groente. Roer die spruite en sade agterna in. Bedien onmiddelik.

Kan saam met rys bedien word as ´n hoofmaal.

Peking-eend / Peking Duck

Die geheim van die Peking-eend is die bros vel. Dit word na die kookproses verwyder en apart bedien.

Dit is belangrik dat die eend se vel kurkdroog is voor daar begin word met die kookproses. Droog die eend goed af en sprei dan die vlerke oop. Dit sal ideaal wees indien jy die voël iewers kan ophang met oopgespreide vlerke. As jy die voël afvee met skoon brandewyn sal dit die droogproses aanhelp. Plaas 'n waaier so dat dit lug op die eend blaas en laat dit so staan vir 4 ure. Jy kan ook die voël oornag in 'n trek hang.

Jy gaan borsels van sprietuie nodig hê. Die sprietuie moet nie langer as 10 cm wees nie. Maak hulle mooi skoon en sny die punte af. Maak 2 vertikale snitte van so 2 cm lank regoor mekaar aan die wit kant van die uie. Dan maak jy nog 2 soortgelyke snitte regoor mekaar tussen die ander snye.

Plaas die uie in 'n bakkie yswater in die yskas. Die gesnyde punte sal opkrul en jou uie sal soos klein borseltjies lyk.

Die eend word bedien met 'n tipe pannekoek. Daarvoor het jy nodig:

450 g meel
600 ml kookwater
30 ml sesame-olie

Sif die meel en meng met die water om 'n sagte deeg te vorm.
Knie die deeg vir 10 minute tot dit 'n rubberagtige struktuur ontwikkel.
Bedek met 'n teedoek en laat met rus vir 20 minute.

Rol die deeg 5 mm dik uit en sny 5 cm-sirkels uit met jou dukker wat jy vir skons gebruik.
Smeer die een kant met sesame-olie en plaas 'n ongesmeerde sirkel bo-op.
Rol albei saam uit, so dun as moontlik. Hulle behoort uiteindelik 'n deursnee van ongeveer 15 cm te hê.

Verhit 'n skoon swaarboompan vir 30 sekondes en draai dan die hitte tot op die laagste merk.
Plaas 'n pannekoek in die pan en draai sodra daar lugborrels begin vorm.

Laat jou pannekoeke afkoel en draai hulle dan toe in foelie en hou hulle in die yskas tot benodig.

Jou eend gaan ook 'n sous nodig hê:

125 ml Hoisin (of pruimsous)
20 ml suiker
20 ml sesame-olie
20 ml koue water

Meng al die bestanddele in 'n klein kastrolletjie tot dit begin kook. Draai die hitte af tot by die laagste merk en roer vir 3 minute.

Gooi die sous in 'n opdienbakkie.

Jy het ook 'n sous nodig vir die bakproses. Meng 45 ml sojasous, 20 ml strooisuiker en 150 ml koue water en verf jou eend daarmee.

Plaas jou eend op 'n draadrak in 'n roosterpan met die bors na bo.

Gooi kookwater in die pan tot dit 6 mm diep is.

Die oond moet aanvanklik verhit wees tot 200ºC.

Plaas die eend onder in die oond vir 'n uur en 'n kwart.
Verf elke 15 minute met die drupsous.

Na 45 minute moet die hitte verhoog word na 230ºC.

Op die stadium kan jy die pannekoeke sommer so in die foelie in die oond sit om dit te verhit.

Voor opdiening verwyder jy die vel en sny of knip dit in 5 cm-blokkies. Hou dit warm.

Sny die eend in lang repe vir bediening.

Plaas nou die vel, eend, pannekoeke, sous en uiborsels (so in die yswater) op die tafel in hul eie opdienborde.

Jy eet die eend deur die twee helftes van die pannekoek versigtig van mekaar af te trek. Gebruik jou borseltjie om die sous op die klam een van die 2 pannekoeke te smeer.

Sit stukke hoender en vel op die sous, vou toe, rol op en eet.