Bone, blare en eier / Beans, Greens and Eggs

BESTANDDELE
'n blikkie bone (baked beans)
2 koppies blaargroente (soos krulkool of spinasie)
2 eiers
sout
olyfolie
ingelegde brandrissies

STAPPE
Verhit die bone en blaargroente saam in 'n klein pan met 'n klein bietjie water.

Sodra dit begin prut, breek die eiers in die pan, strooi sout oor elke eier, plaas 'n deksel op die pan en kook oor lae hitte totdat die eierwit gestol is en die geel na jou smaak is.

Drup mildelik olyfolie oor en sit voor met ingelegde brandrissies.

Bone en eier op roosterbrood / Beans and Egg on Toast

BESTANDDELE
'n hand vol koljander, fyngekap
2 knoffelhuisies, fyngekap
'n eetlepel olyfolie
sout na smaak
'n blikkie bone
'n sny brood, gerooster
1 of 2 eiers, gebak
botter
'n rissie, fyngekap
'n stingelui vir garnering

STAPPE
Verhit die olie in 'n pan en braai die koljander, knoffel, rissie en sout oor matige hitte totdat dit net begin sag word - sowat 2 minute.

Voeg die bone by en verhit tot alles warm is.

Wanneer die bone warm en die eiers gaar is, smeer die roosterbrood met botter en skep die bone oor.
Plaas die eier bo-op.
Garneer met stingeluie.

Gebakte eier slaai / Fried Egg Salad

BESTANDDELE
1 gebakte eier, in growwe stukkies gesny
2 teelepels mayonnaise
'n paar druppels suurlemoensap of rysasyn
2 druppels sriracha- of ander rissiesous
gekapte koljander of pietersielie
Opsionele byvoegings: 1–2 teelepels fyngekapte salotte of stingeluie, geweek in yswater of suurlemoensap vir 5 minute

STAPPE
Plaas die eier in 'n bak en maak fyn met 'n vurk.
Voeg mayonnaise, suurlemoensap en sriracha by en meng goed. Voeg meer mayonnaise by as dit droog lyk.
Voeg die kruie by en gaan voort met die fynmaak.
Voeg enige van die opsionele byvoegings by.
Proe vir sout; pas aan.

Bedien met sourbeskuitjies of roosterbrood.

Eierslaai vir broodjies of peuselhappies

BESTANDDELE
Gekookte eiers
knoffel, fyngekap
sout
gerasperde suurlemoenskil
grasuie, gekap
varsgemaalde swartpeper
rissiesous
mayonnaise

STAPPE
Maak die eiers fyn in 'n bak met 'n vurk.

Voeg die sout, knoffel, suurlemoenskil en 'n groot handvol grasuie by die eier.
Voeg die swartpeper by en dan die rissiesous.
Voeg die mayonnaise oordeelkundig by, proe vir wanneer dit jou smaak en gebruik gaan pas.
Voeg enige ander kruie of piekels by wat jy dink goed sal pas.

Radys frittata / Radish Frittata

3 koppies gekapte radyse
olyfolie
sout
8 eiers, geklits met 'n knippie sout
gekapte tiemie (opsioneel)
2 koppies groente (vars spinasie, gebraaide uie, gekapte stingeluie en/of koljander)

Verhit die oond tot 200°C.

Meng die radyse in 'n bak met 'n bietjie olyfolie en sout en plaas op 'n bakplaat.
Rooster tot gekaramelliseer en goudbruin; vir omtrent 10 minute.
Laat afkoel en verlaag die oondtemperatuur tot 180°C.

Voeg die radys, 'n knippie tiemie en groente by die eier en roer om te kombineer.

Verhit 'n oondvaste pan. Bedek goed met olyfolie. Voeg die eiermengsel by en skuif die gestolde deel 'n paar keer na die middel. Sodra die kante gestol het, plaas dit in die oond. Kook tot die bokant net gestol het; omtrent 8 minute.
Laat dit 'n bietjie afkoel in die pan en keer dan om.

Soos die meeste frittatas, is hierdie een beter by kamertemperatuur as warm.

Artisjokke en roereier / Artichoke Scramble

3 eiers, geklits
¼ teelepel sout
2 eetlepels botter
3 ingemaakte artisjokharte, afgespoel en in skywe gesny
’n knippie vars gekapte kruie
varsgemaalde swartpeper

Klits die eiers en sout in 'n bak.

Verhit 'n klein kleefvrye pan, voeg die helfte van die botter by en voeg dan die artisjokskywe by. Kook oor medium hitte totdat dit net begin bruin word, draai dan om en verbruin aan die ander kant.
Roer die kruie by en hou eenkant.

Plaas die pan terug op die hitte en voeg die oorblywende botter by, dan die eiers, dan die artisjokke, en roer liggies.
Voeg die swartpeper aan die einde by.

Eiers geposjeer in rooiwyn / Oeufs à la Bourguignonne

Dit is ’n heerlike gereg vir 'n ligte aandete of 'n winter-middagete, en kan meer substansieel word as dit versier word met gestoofde uie, en gesoteerde of gebraaide sampioene. Bedien dit met 'n ligte rooiwyn. Tradisioneel word die eiers in die wyn geposjeer, maar dit kan ook in aftreksel gaarmaak word.

BESTANDDELE
2 koppies bouillon of ’n vegetariese aftreksel
2 koppies goeie, jong rooiwyn
8 baie vars eiers
½ lourierblaar
3 pietersielietakkies
¼ teelepel tiemie
1 knoffelhuisie, fyngedruk
1 eetlepel gekapte stingelui
’n knippie rooipeper
’n knippie peper
1½ eetlepel saggemaakte botter
2 eetlepels meel
2 eetlepels sagte botter

STAPPE
Bring die aftreksel en wyn tot kookpunt en posjeer die eiers daarin. Verwyder die eiers na ’n vuurvaste bak, voeg 6 mm van die vloeistof by en hou eenkant. Ongeveer 5 minute voor opdiening, plaas die bak onbedek oor pruttende water om die eiers weer op te warm.

Nadat die eiers geposjeer is, voeg die kruie, knoffel, stingelui en speserye by die wyn en kook dit vinnig totdat dit tot 2 koppies verminder het. Verwyder die pietersielie en lourierblaar.

Meng die 1½ eetlepel botter en meel tot ’n gladde pasta – Beurre manié. Verwyder van die hitte en klits dit met 'n draadklitser by die wynmengsel. Kook vir 30 sekondes.

Net voor opdiening, verhit die sous weer tot dit prut. Verwyder van die hitte en klits die 2 eetlepels botter by.

Bedien die eier op roosterbrood, skep die sous oor en garneer met pietersielie.

Saggekookte eier / Oeufs mollets

Oeufs mollets is saggekookte eier wat as ’n plaasvervanger vir geposjeerde eiers gebruik kan word.

Laat sak ’n eier stadig in ’n pot water wat kook.
Kook vir 6½ minute vir groot eiers.

Dompel dan die eier onder lopende water.

Hou dit in die yskas indien jy dit koud wil bedien. Verhit dit in ’n bakkie warm water indien jy dit later warm wil bedien

Arabiese omelet

Só maak jy 'n Arabiese omelet – of ten minste, volgens Alexandre Dumas.

Kap 'n vars ui in klein stukkies, sit dit in 'n braaipan saam met 125 mℓ olyfolie. Laat dit sag kook sonder dat dit verkleur.
Voeg twee groot gekapte rooi soetrissies by. Voeg ook twee goeie, geskilde en ontpitte tamaties by wat in klein stukkies gesny is, by. Geur hierdie eerste voorbereiding met 'n bietjie sout en 'n tikkie cayennepeper. Kook enige vloeistof bietjie af en verwyder dan van die hitte.
Roer 4 ansjovisfilette by die inhoud.
Klits ten minste 3 eiers met 'n vurk.
Vryf nou die onderkant van 'n omelet-pan met 'n knoffelhuisie.
Verhit die oorblywende 125 mℓ olyfolie in die pan. Wanneer dit deeglik warm is, gooi die eiers in, laat die omelet stol en voeg die mengsel wat jy vroeër voorberei het daarby.
Skuif dit oor op ’n bord of skottel na ’n paar sekondes.

’n Tuna middagete

’n Ligte ete vir wanneer jou tyd beperk is ... en goeie gebruik vir tuna in ’n blikkie.

BESTANDDELE
1 blikkie tuna in water, gedreineer
1 ½ eetlepels mayonnaise
4 teelepels sriracha-sous
Varsgemaalde swartpeper, na smaak
Gesnyde komkommers of ander bros groente, in baie dun ringe gesny (opsioneel)
Sesamsaad (opsioneel)
’n Paar repies avokado
’n Gekookte eier
’n Paar druppels lemmetjiesap
Gekapte kropslaai.

STAPPE
Meng die eerste vyf bestanddele saam.
Plaas op kropslaai.
Strooi sesamsaad oor.
Garneer met die avokado en die heel eier.
Drup lemmetjiesap oor.

Biltongquiche

Hierdie biltongquiche resep is genoeg vir 6 persone.

1 x 23 cm broskorsdeeg, blind gebak
1 bossie sprietuie, fyngekap
125 g klam biltong, in dun skyfies gesny
3 eiers, geklits
125 mℓ room

125 mℓ suurroom
50 mℓ parmesaan, gerasper
50 mℓ songedroogde tamatiepesto
Varsgemaalde swartpeper, na smaak

Versprei die sprietuie en biltong op die bodem van die tertkors.

Klits die res van die bestanddele saam en giet oor die bestanddele in die tertkors.

Bak die quiche by 180°C vir 30 minute of tot dit goudbruin en gestol is.

Mosselquiche

Deeg
375 mℓ meelblom
1 mℓ sout
100 g botter, in blokkies gesny
5 mℓ suurlemoensap
50 mℓ koue water

Gebruik ’n voedselverwerker om die deeg te maak. Plaas eers die meel, sout en botter daarin en meng goed. Hou die masjien aangeskakel en voeg die suurlemoensap en water stadig by deur die voerbuis. Hou dit aan tot die mengsel ’n bal vorm.
Draai die deeg toe in plastiek en verkoel vir 1 uur.
Rol die deeg uit en voer ’n 24 cm riffelpan daarmee uit.
Bedek die deeg met waspapier en vul tot by die rand met droë boontjies.
Verhit ’n oond tot 200°C met ’n bakplaat daarin.
Wanneer die oond die regte temperatuur bereik plaas jy die riffelpan op die bakplaat en bak vir 10 minute.
Verwyder die papier en boontjies en bak nog 5 minute.

Vulsel
20 mℓ kookolie
2 preie, fyngekap
1 blik mossels (225 g), gedreineer en grof gekap
3 eiers
250 mℓ melk
125 mℓ room
’n knippie neutmuskaat
2 mℓ sout
5 mℓ meelblom
Paprika

Verhit die olie in ’n kastrol en voeg die preie by. Plaas die deksel op en laat dit stadig sweet tot sag.
Dreineer die preie op ’n papierhanddoek.
Klits die eiers, melk, room, neutmuskaat en sout.
Strooi die 5 mℓ meelblom op die tertdop.
Rangskik die preie en mossels op die tertdop.
Gooi die eiermengsel versigtig in die dop en strooi die paprika oor.
Bak vir 40 minute of tot dit net gestol het.

Sit die quiche onmiddellik voor.

Die resep vir mosselquiche is genoeg vir 6 tot 8 persone.

Mine Frite

Mauritius se gebraaide noedels.

3 eetlepels olie
4 knoffelhuisies, fyngedruk
1 ui, gekap
¼ kool, gekap
2 wortels, gekap
4 pakkies gaar 2-minuut-noedels – hou ’n ½ koppie van die kookvloeistof
¼ koppie sojasous
Sout en gemaalde peper
2 eiers, geklits

Verhit 2 eetlepels olie in ’n pan en braai die knoffel, ui, kool en wortels vir 5 minute.

Voeg die noedels en sojasous by en laat vir 3 minute deurwarm word. As die mengsel te droog raak voeg jy van die behoue kookvloeistof by.
Geur en hou eenkant.

Verhit die orige olie in ’n skoon pan en gooi die geklitste eier daarin. Maak ’n omelet gaar.
Sny die omelet in repies.

Meng die omelet en noedels en sit voor.

Soufflé Rothschild

Hierdie omelette word as nagereg bedien.

’n verskeidenheid vars vrugte in dun skywe gesny, byvoorbeeld 1 perske, 4 aarbeie en 1 piesang
1 dun skyfie pynappel
2 eetlepels rum / kersielikeur / lemoenlikeur
Gesifte versiersuiker

Soufflé-mengsel
3 eiergele
1 eetlepel strooisuiker
2 eetlepels slagroom
4 eierwitte

Berei ’n soufflé-bak en stel die oond op 190°C.

Gooi al jou vrugte saam in ’n bak en gooi jou alkohol oor. Besprinkel met versiersuiker na smaak. Bedek en laat 30 minute staan.

Room die eiergele en strooisuiker saam.
Voeg die room by.

Klop die eierwitte tot styf en vou met ’n metaallepel by die mengsel in.

Skep ⅓ van hierdie mengsel in die soufflé-bak. Sit die helfte van die vrugte bo-op. Bedek die vrugte met nog ’n ⅓ van die mengsel, daarna ’n laag vrugte en dan die res van die mengsel.

Bak 15 tot 20 minute lank. Besprinkel die soufflé na 12 minute met 2 eetlepels gesifte versiersuiker en bak vêrder om die suiker te karamelliseer.

Korslose souttert – ’n eenvoudige resep

1 liter melk
2 blikkies Bull Brand “corned beef”, fyngemaak
4 koppies gerasperde cheddar - rasper bietjie ekstra cheddar vir bo-op
1 koppie koekmeelblom – moet dit nie sif nie
6 eiers, geklits
2 uie, gekap
10 mℓ sout
10 mℓ mosterdpoeier
10 mℓ gedroogde pietersielie
4 mℓ knoffelsout

Meng alles (nie die ekstra cheddar nie) saam en gooi in ’n gesmeerde oondbak. Bak in ’n voorverhitte oond teen 180°C tot gestol en ligbruin. Dit kan tot 40 minute in die oond bly.

Spinasie-roulade / Spinach Roulade

450 g spinasie, skoongemaak en stingels verwyder
15 g botter
Sout en peper
4 eiers, geskei
Parmesaan / sterk cheddar, gerasper

Vulsel:
70 g sampioene, fyngekap
15 g botter
4 teelepels broodmeel
Sout en peper
140 mℓ melk
’n knippie gemaalde neutmuskaat
3 eetlepels room

Voorverhit ’n oond tot 200°C.

Kook die spinasie in soutwater vir 8 minute.
Druk die vloeistof uit die spinasie en maak die groente dan fyn tot ’n moes.
Roer die 15 g botter by en geur na smaak.
Klop elke eiergeel apart by.
Klop die wit van die eiers styf en vou met ’n metaallepel by die mengsel.

Plaas botterpapier op ’n rolkoekpan van 30 cm by 20 cm.
Skep die mengsel uit op die bakpapier en druk dit gou plat tot dit 1 cm dik is. Strooi die kaas dik oor.
Bak dit vir 10 minute op die boonste rak van jou oond tot dit uitgerys en ferm is.

Vir die vulsel soteer jy die sampioene in die 15 g botter.
Roer die meel by en geur na smaak.
Roer die melk by en bring tot kookpunt. Laat dit prut tot dit romerig is. Verwyder dit dan van die hitte.
Roer die neutmuskaat en room by.

Keer die gaar roulade uit op ’n stuk waspapier.
Trek die papier waarop dit gebak is af.
Smeer die vulsel oor en rol op.
Sny die rante netjies af.
Bedien op ’n warm skottel en strooi nog parmesaan oor en garneer met kruie.

(Opsioneel: Gerookte salm kan op die vulsel gepak word daarvoor opgerol word.)

Benedict-eiers / Benedik-eiers / Eggs Benedict

Berei die Hollandaise-sous voor volgens hierdie resep. Hou eenkant terwyl jy die eiers posjeer.
Gebruik hierdie resep vir geposjeerde eiers.

Braai rugspek tot gaar en plaas dit op gebotterde brood of muffins.
Plaas ’n eier op die spek en bedek met twee eetlepels Hollandaise-sous.
Bedien.

Asperges à la flamande / Aspersies met eier

12 wit aspersies
2 gekookte eiers
30 g botter, gesmelt
Vars gekapte pietersielie
Sout en peper

Skil die aspersies en sny die punte af.
Plaas in gesoute kookwater en kook vir 6 minute.
Dreineer.

Druk die eier fyn en meng met die botter en pietersielie, sout en peper na smaak.
Gooi oor die aspersies en bedien.

Groente en kruie frittata / Frittata alle Erbe

800 g gemengde groente (bv. spinasie, preie, uie, ens.) in stukkies gesny
6 eetlepels olie
1 takkie vars salie, fyngekap
6 basiliekruidblare, fyngekap
4 eiers, geklop met ’n knippie sout en peper
Sout
Varsgemaalde swartpeper

Kook die groente in ’n koppie soutwater.
Wanneer dit sag is dreineer die water en druk enige oortollige water uit.
Verhit olie in ’n pan en braai die groente en kruie saam oor lae hitte vir 5 minute.
Gooi die groente by die eier en meng goed.

Verhit nog olie in die pan tot baie warm.
Gooi die eier en groente in die pan.
Wanneer die onderkant verbruin het draai jy die frittata om en braai die ander kant.

Die frittata kan warm of koud bedien word.

Spinasie-soufflé / Spinach Soufflé

680 g spinasie, gewas en in stukkies geknip
15 g botter
Sout en peper
’n knippie neutmuskaat
3 eiergele
4 eierwitte
1 eetlepel gerasperde cheddar
1 eetlepel bruingebakte broodkrummels

Sous
28 g botter
2 eetlepels meelblom
Sout en peper
140 mℓ melk

Vir hierdie resep benodig jy ’n no. 1 soufflé-bak (17,5 cm deursnee).

Stel die oond op 190°C.

Kook die spinasie vir 8 minute in kookwater.
Dreineer en druk die oortollige water uit.
Druk dit deur ’n sif en plaas terug in die kastrol.
Verhit dit oor matige hitte om van die oortollige vloeistof ontslae te raak.
Voeg die botter by en geur met sout en peper. Plaas eenkant.

Berei die sous deur die botter te smelt. Trek van die hitte af en voeg die meelblom by, geur en roer die melk by.
Voeg die spinasie en neutmuskaat by die sous. Proe vir sout.
Klop elke eiergeel apart by.

Klop die eierwit styf en vou 1 eetlepel daarvan by die mengsel.
Vou nou die res van die eierwit in en skep in ’n bereide bak.
Strooi die kaas en broodkrummels bo-oor.

Bak 25 tot 30 minute tot die soufflé uitgerys en ferm is.