Kalkoen met granate

1 skoongemaakte kalkoen – een van sowat 2 kg
Jy het ook die kalkoen se lewer nodig. As dit nie saam met die kalkoen gekom het nie, koop sommer hoenderlewers. Kap die lewer fyn.
3 granate se sade – gebruik granaatsap as jy nie granate kan kry nie
100 g pancetta, baie dun gesny
100 mℓ olie
Sout en varsgemaalde swartpeper

Vryf die kalkoen met sout en peper en bedek dit met die pancetta. Veral oor die bors. Dit is sodat die vleis nie te droog moet braai nie.
Braai dit in ’n oondbak in ’n 180°C-oond vir 1½ uur. Draai dit gereeld om.
Halfpad deur die kookproses bedruip jy die kalkoen met die fyngedrukte sade van 2 granate.

Verhit die olie in ’n souspan en voeg die lewer, ’n klein bietjie sout en die fyngedrukte pitte van die derde granaat by. Gebruik 15 mℓ granaatsap as jy nie ’n granaat het nie. Kook dit stadig tot die sous begin verminder en verdik.

Wanneer die kalkoen gaar is verwyder jy die pancetta en sny die vleis in skywe.
Pak die skywe uit op ’n plat bord en gooi die sous oor en bedien dadelik.

Pienk kalkoenkebabs / Pink Turkey Kebabs

Borsies of vleis soos jy verkies, vir 6 persone in blokkies gesny
60 ml sojasous
1 ml pienk kosgeursel
60 ml heuning
60 ml tamatiesous

Ryg blokkies in sosatiestokkie - onthou om houtstokkies vir 'n ruk in water te week. Wissel af met varkspek en/of klein stukkies droëvrugte na smaak. Meng laaste vier bestandele en gooi oor sosaties. Marineer in yskas oornag. Haal uit marinade en bak in gesmeerde bakplaat en rooster vir 5 minute aan elke kant. Bedruip gedurig met sous. Bedien in ronde diep glasbak - die sosaties moet regop kan staan. Laat takkies roosmaryn tussen in staan en langs die kant afhang. Rooi kersies kan ook aan die punte geryg word maar dan moet dit onder wees sodat die gaste se hande nie taai word as hulle dit neem nie.

Bedien met 'n shiraz.

Resep: Petro van der Westhuizen