Voedsel as ´n seksstimulant

Of jy nou ´n straatveër is en of jy ´n rekenaarprogrameerder is, een of ander tyd in jou lewe gebeur dit dat die wil om romanties te wees nie meer daar is nie. Maar wat moet jy doen om daardie wil terug te kry? Eerstens kan jy apteek toe hardloop en een van daardie blou pille gaan koop of jy kan ´n natuurlike metode gebruik, voedsel.

Om iets te eet is in elk geval meer romanties as om pille te drink. Die koning van hierdie stimulante is oesters. Die vorm en smaak sal jou mond laat water vir dit wat voorlê. Knoffel, uie, tiemie en roosmaryn is ook hoog op die lys. Die bestanddele vorm natuurlik die basis van pastasouse. Hier moet ek net noem dat knoffel ook die teenoorgestelde uitwerking kan hê as dit deur net een van die twee vennote in die liefdespel geëet word.

Speserye soos kardemom, naeltjies, gemmer en neutmuskaat kan ook nie weggegooi word nie. Hierdie speserye vorm natuurlik die basis van Indiese geregte. Hierdie speserye laat jou ´n warm gevoel kry en dit is natuurlik ´n voorvereiste in die liefdespel. Naeltjies en neutmuskaat word baie gebruik in disse wat voorberei word vir Kersfees.

Sekere kosse bevat geen chemiese middels om jou te prikkel nie, maar net die vorm kan baie suggestief wees. Wanneer jy dit saam met jou geliefde eet in ´n romantiese omgewing weet mens nooit waar dit kan eindig nie. Die kos waarvan ek hier praat (wat meer suggestief is as iets anders) is aspersies.

Seldery bevat androsterone. Dit is ´n manlike hormoon wat in staat is om dinge wakker te maak in vrouens. Verder word daar beweer dat piesangs goed is vir mans om hulle stamina te verhoog. Maar ongelukkig bestaan daar geen wetenskaplike bewyse hiervoor nie.

Daar word altyd beweer dat ontbyt goed is vir ´n mens. Maar nou is daar bewyse hiervoor. Wanneer jy Hawermoutpap eet in die oggend laat dit jou dinge doen in die aand. Hawermout is ´n katalisator wat testosteroon by mans vrystel.

Die stimuleerders kan nie vir romanse instaan nie. Daar is geen beter prikkelaar as ´n ete, saam met ´n heerlike bottel wyn en die regte atmosfeer wat die vuurtjie kan aansteek nie.

Hou matigheid voor oë en moet net nie te veel eet nie.

deur Frik Lombard