Beesvleis-sauté met port en sampioene

Die resep is vir 6 persone, so jou vleis moet in totaal omtrent 1 kg wees.

beesvleis
40 g botter
300 mℓ port
15 mℓ meel
400 mℓ aftreksel
sout en peper
450 g sampioene, fyngekap
2 knoffelhuisies, fyngekap
pietersielie vir garnering

Smelt die helfte van die botter in 'n kastrol en braai die vleis bruin aan alle kante.
Haal die vleis uit en hou warm eenkant.

Gooi die port in die kastrol en bring tot kookpunt. Kook tot die wyn met die helfte verminder het.
Gooi die wyn oor die vleis.

Smelt nou die orige botter in die kastrol waarin die wyn was.
Roer die meel by en kook tot die mengsel begin verkleur.
Voeg nou die aftreksel by en roer aanhoudend tot die mengsel begin kook.
Draai die hitte af tot laag, voeg die vleis en wyn by, geur met sout en peper, plaas die deksel op an laat 1 uur lank prut.

Voeg die sampioene en knoffel by die vleis. Prut verder tot die sampioene sag is. Maak ook seker dat die vleis baie sag is.

Strooi gekapte pietersielie oor wanneer jy dit bedien. Sit dit voor saam met geroomde aartappels en ertjie-flamande.