Blomkool-en maalvleiskoek

Genoeg vir 4 tot 6 persone
Bereidings- en gaarmaaktyd: 20 minute
Afkoeltyd: 30 minute
Baktyd: 30 minute
Staantyd: 15 minute

Betower jou kuiergaste – selfs jou skoonma – met hierdie indrukwekkende koek van ’n hoofmaaltyd.
Dis selfs lekker teen kamertemperatuur.

krummellaag
¼ k olie vir diepbraai
1 k vars broodkrummels
1 t droë pietersielie
sout en varsgemaalde swartpeper na smaak

blomkool
1 klein blomkool, harde stingeldele uitgesny en in blommetjies gebreek
1 t sout

maalvleismengsel
3 e olie vir braai
1 groot ui, fyngekap
1 knoffeltoontjie, gekneus en fyngekap
300 g maalvleis
1 t Marmite
1 e gekapte vars pietersielie
sout en varsgemaalde swartpeper na smaak

eiermengsel
7 eiers
1 e gekapte vars pietersielie
1 k koekmeel
1 ½ t bakpoeier
½ t borrie
sout en varsgemaalde swartpeper na smaak
1 k gerasperde en gemengde cheddar- en parmesaankaas (of net cheddarkaas)

Krummellaag: Verhit die olie in ’n diep swaarboompan en braai die broodkrummels tot bros en bruin. Voeg die pietersielie by en geur met sout en peper. Hou eenkant om af te koel.

Blomkool: Plaas die blomkool en die sout in ’n kastrol en bedek met net genoeg water. Verhit tot kookpunt en laat liggies prut tot die blomkool gaar, maar nog ferm is. Dreineer en hou eenkant.

Maalvleismengsel: Verhit die olie in ’n swaarboompan en braai die ui tot sag en deurskynend. Voeg die knoffel by en braai vir nog ’n minuut of twee. Voeg die maalvleis by en roer liggies met ’n vurk sodat die vleis nie klonte vorm nie.
Voeg die Marmite by en roer die pietersielie deur. Geur met sout en peper. Braai tot die vleis verbruin het en gaar is. Hou eenkant om af te koel.

Voorverhit die oond tot 180 °C. Smeer ’n 22 cm-losboomkoekpan met botter en voer met bakpapier uit. Smeer die bakpapier met gesmelte botter.

Eiermengsel: Klits die eiers in ’n groot mengbak. Voeg die pietersielie by en sif die koekmeel, bakpoeier en borrie by. Geur met sout en peper en klits goed. Roer die kaas by.

Roer die maalvleismengsel by die eiermengsel. Roer die blomkool versigtig by sodat die blommetjies nie breek nie.

Giet die broodkrummels in die koekpan en draai die pan sodat die krummels teen die kante vassit (daar sal net hier en daar ’n paar krummels vassit). Versprei die krummels eweredig op die bodem van die koekpan.

Giet die vleismengsel in die koekpan en maak gelyk boop. Bak in die oond vir 30 minute of tot ’n toetspen skoon uitkom wanneer jy dit in die maalvleiskoek druk. Laat staan die gaar maalvleiskoek vir minstens 15 minute om ’n bietjie af te koel. Sit voor saam met Uiemarmelade en ’n mengelslaai.