Die anderkant van suiker

In reaksie op Frik Lombard se Suiker en jou dieet.

Ek is bly om te sien julle raak aan gesondheid omdat ek glo dat onse boerenasie al lank die kat aan die stert beet het.

So lief as wat ek my grootouers gehad het was daar altyd potte kos voorbei met hope onnodige vette. My ouma aan pa se kant het bv. die lekkerste beetslaai gemaak (geheime bestandeel in die sous sien) maar het ´n hengse lot olie bygevoeg om dit te laat BLINK!?! Ek los die olie uit en dit proe dieselfde.... blink of de not. Dan praat ons nie eers van die olie, varkvet en room in ´n gewone gekookte Sondag-middagete nie.

Die tradisie is natuurlik aan ons ouers oorgedra en dan wonder ons hoekom sukkel fikse mense soos Danie Gerber met hulle harte.

Natuurlik help dit om fiks te wees en te oefen maar die gemors wat ons dag na dag vir ons liggame voer manifesteer nie slegs deur vet te word nie!!! Dit gaan sit vas (dis reg sit vas!) in ons are. Ons liggaam kan net ´n sekere hoeveelheid vet uit die bloedstroom opneem en as jy te veel vet te vinnig inneem kan jou liggaam nie byhou nie. Mettertyd pak dit meer en meer saam in jou are en dan het die bloed minder en minder plek om deur te kom. Dan tree die hoë bloeddruk en cholesterol in.

Dit is ook skrikwekkend dat mense steeds klou aan die kalorieë in kos. Ja dit gee ´n aanduiding van die energieinhoud van ´n kossoort - maar nie die kwaliteit van daardie energie nie.

En dis nou waar ek kom by die suiker storie.

Dit is belangrik om kwaliteit kossoorte in te neem wat ´n mens langdurige energie verskaf. Jou liggaam verbrand dan op ´n konstante vlak energie en vette en jy voel nie tam en moeg of asof jy rooimiere in jou broek het nie.

Ja dis waar dat suiker nie ´n sleg-ding is nie - en in moderasie en gebalanseerd geneem is dit ´n uitstekende bron om vinnig energie in jou liggaam te kry sou jy aktief verkeer. Maar...

Sodra suiker opgeneem is in die bloed, skiet jou bloedsuikerinhoud tot sy maksimum! As jy nie besig is om te oefen of iets stremmends met jou liggaam te doen waarheen hierdie energie kan gaan nie moet jou liggaam op hou met party funksies soos om vet te verbrand en probeer eers om die bloedsuikervlak weer terug te kry na normaal. Wat erger is is dat suiker se effek in jou bloed van korte duur is - en dat die bloedsuikervlak nie net weer bedaar na normaal nie maar val tot onder dit. Dan moet jou liggaam weer omswaai en haastig seine stuur dat die vlak nou weer te laag is. En die seine is.... jy' s honger ... eet vinnig iets!! Die gevolg is dus ´n wipplank ryery met jou metabolisme.

So as jy dus aanhoudend jou dieet gaan vul met swak kwaliteit energie soos suiker, witbrood, pap en ander verfynde produkte (asook natuurlik alombekende vyand diervet en sleg-olies)... maak seker jou medies dek hartomleinings en hoop en bid dit is die ergste wat gebeur.

Ja ek weet ons almal wil dit afwaai en sê dat dit sommer nou net weer stories is wat begin word deur mense wat hul dieetprodukte wil verkoop. Maar ons moet ophou om die maklike pad te neem en ten minste die moeite doen om dit na te vors as jy nie iemand is wat blindelings glo nie.

Natuurlik gaan dit moeilik wees om dekades en geslagte se slegte gewoontes te verander. Maar vir ons kinders se toekoms en lewenskwaliteit sal ons moet ophou om die skyfies en vis wat maklik is en die brood en jam wat vinnig is op te dis. ´n Gewoonte begin en eindig by die huis. Ons sal moet begin kyk na gesonder alternatiewe.

Daar is baie boeke hieroor en ek sien al hoe meer voedselvervaardigers spesifiseer op die produkte presies wat gebruik is in die vervaardiging.

Daar is ook ´n goeie vervanger vir suiker genaamd fruktose wat die bloedsuiker 40% minder laat opskiet.

As julle dit bietjie navors sal julle ook agterkom dat tussen die op en af van bloedsuikervlakke insulien sit. Ons liggame vervaardig dit uit nature as ´n metaboliese funksie. Dit is baie keer kinders met ´n sensitiewer metabolisme (oorerflik) wat vinniger suikersiekte opdoen gedeeltelik a.g.v. swak kwaliteit kossoorte.... die res van ons se liggame kan jarre se misbruik weerstaan voordat tot hulle volwasse diabetes ontwikkel.

Sekerlik kan jy dan en wan suiker inneem (saam met koffie 8x ´n dag is nie dan òf wan nie). Alle kossoorte kan geniet word mits baie groente, vrugte, gesonde proteïne & stysel ´n reel is en die ongesonde lekkertes ´n uitsondering op daai reel is.

Hier is my lofgesang dan tot ´n einde.

deur Lizé B