Eet slim vir sport

Ná die wegholsukses van Eet vir volgehoue energie 1 en 2 en Eet slim en bly slank het geregistreerde dieetkundige Liesbet Delport nou met dr. Paula Volschenk, 'n geregistreerde dieetkundige wat in sportvoeding spesialiseer, saamgespan. Die resultaat is nog 'n wenner: 'n praktiese gids oor presies wat, wanneer en hoeveel om te eet as jy mededingend aan sport deelneem.

Hul realistiese benadering sal jou help om 'n gesonde, gebalanseerde dieet vir optimale sportvoeding te volg, jou gewig te beheer, fiks te bly en jou prestasievlakke te verhoog terwyl jy professioneel in enige sportsoort meeding.

Eet slim vir sport wys jou stap vir stap hoe om jou eie buigsame eetplanne op te stel voor, tydens en ná 'n kompetisiedag. Ontdek ook hoe om jou eetgewoontes by jou oefenprogram aan te pas, jou vetinname te verlaag en die konsepte van GI en GL in te span om jou 'n mededingende voorsprong te gee. Jy kan steeds smaaklik eet terwyl jy 'n gesonde, gebalanseerde dieet volg en volgehoue energievlakke handhaaf. Die nuttige tabelle agter in die boek verskaf 'n uiteensetting van die basiese voedingsbehoeftes vir sowel sportmense wat wil gewig verloor as diegene wat hul gewig wil handhaaf.

Hierdie nuwe gids is jou paspoort tot 'n sterker, fikser, meer energieke en gesonder jy!.