Skotse eiers

Vogens die Skotte dateer die manier van eiers voorberei uit die Middeleeue. Skotse veeherders het glo kos op die manier voorberei, sodat dit nie nodig was om smiddae terug te keer huis toe vir ete nie. Saam met ’n stuk brood en iets om te drink kon dit sommer in ’n stuk lap veld toe geneem word.

Engelse kosskrywers verskil van die Skotte. Hulle beweer Skotse eiers is die uitvindsel van ’n winkel in Londen, Fortnum & Mason, in 1738.

Om Skotse eiers te maak het jy een hardgekookte eier nodig per persoon. Rol die eiers in ‘’n bietjie meel.

Die vleis is maalvleis wat gebruik word om wors mee te stop. Tradisionele boerewors pas perfek by hierdie eiers. Jy het omtrent 60 g vleis per eier nodig. Maak die eier aan alle kante toe met die vleis. Jy sal eindig met iets wat lyk soos ’n groot vleiseier.

Klits een eier by 125 mℓ melk vir ’n mengsel waarmee jy die vleiseiers verf. Nadat jy dit met die eiermengsel geverf het rol jy die eiers in broodkrummels.

Diepbraai die eiers tot hulle mooi bruin is. Moet nie te haastig wees met die braai nie. Die vleis moet gaar word, so een eier moet ten minste 3 to 5 minute in die olie wees.

Koel die eiers af vir 10 minute voor jy dit bedien. Sny in die lengte oop wanneer jy dit voorsit. Sorg dat daar ’n paar druppels sterk mosterd byderhand is vir die eiers.

Die eiers is steeds lekker saam met ’n stuk brood en ’n bier, of die Skotte nou die storie opmaak of nie.

(foto geneem by die Fort Street Brewery in Lincoln Park, Chicago, deur Rex Roof)