Veldkoolbredie

Veldkool is op verskeie maniere voorberei deur ons voorouers. Vandag is die plante skaars en word hoofsaaklik in die Wes-Kaap aangetref.

Gebruik die toppe van die plant. Was dit, maak droog en kap dit fyn.
Smoor die veldkool in ’n bietjie botter, met die deksel toe. Die water wat afkook moet weggegooi word sodat dit kan droogkook.

In ’n aparte kastrol smoor jy ’n fyngekapte ui saam met blokkies skaapvleis tot die vleis sag is.
Voeg die veldkool by wanneer die vleis sag is en geur met sout en peper.
Laat die bredie verder smoor tot die geur van die veldkool in die vleis ingetrek het.