Proe die Beste ... Pinotage!

Die Boer restaurant teater tesame met die Pinotage Assosiasie van Suid Afrika , maak saam die volgende belofte: Vir slegs R300 ALLES INGESLUIT gaan jy een van die beter aande in jou lewe beleef!

Ter viering van Pinotage-wyn, as ’n eg Suid-Afrikaanse produk, bied ABSA  in samewerking met die Pinotage Assosiasie drie onvergeetlike aande aan. Proe die Beste, soos hierdie heerlike eet, proe en kuiergeleenthede bekend staan, word hierdie jaar by Die Boer Restaurant-teater in Durbanville aangebied, op 6, 7, en 8 Oktober.

Bekende wynmakers soos, Beyers Truter (Beyerskloof), Etienne Louw (Altydgedacht), Abrie Beeslaar (Kanonkop)  en De Wet Viljoen (Neethlingshof)  sal die Pinotage Assosiasie verteenwoordig en oor hul wyne gesels.

Heleen Meyer, bekende koskenner, het met gewilde Suid-Afrikaanse bestanddele, ’n spyskaart saamgestel wat elke wyn komplimenteer. Sy gaan saam met die wynmakers oor goeie kos en wyn gesels.

En vir die geleentheid het ons spesiaal twee kunstenaars gekies wat  bekend is dat hulle lief is vir kuier saam met goeie kos en wyn.  Musikant, digter en troebadoer Valiant Swart en skrywer,  reisiger en storieverteller Johan Bakkes  sal saam met die wynmakers op die verhoog wees en al die kos en wynpraatjies afwissel met musiek en stories soos net hulle kan.

Spyskaart:
Elkeen van die verskillende Pinotage en Cape Blend wyne gaan met ‘n gereg geproe word. Heleen Meyer gaan saam met die Boer se Chef Jean Louis Geldenhuys werk om 'n verskeidenheid topklas geregte vir hierdie geleentheid voor te berei. Die tema is Eg Suid-Afrikaans, soos Pinotage. Maak jouself gereed vir heerlike sosaties, soos Ouma dit gemaak het. Of wat van malvapoeding met ‘n verskil, wat jou mond laat water? Daar gaan nog bekende Suid-Afrikaanse geregte en tussengange wees én die nou reeds bekende sjokoladetruffels, wat altyd op ‘n Proe die beste-spyskaart is.
Al die onderstaande wyne gaan saam met bypassende kosse geproe en bespreek word:

Altydgedacht Perlé Pinotage Rosé 2015 (by aankoms voorgesit met ‘n peuselhappie)
Altydgedacht Tintoretto Cape Blend 2013
Altydgedacht Pinotage 2014
Kanonkop Pinotage 2013
Beeslaar Pinotage 2013
Neethlingshof Pinotage 2014
Neethlingshof Owl Post Pinotage 2013
Beyerskloof Faith Cape Blend 2011
Beyerskloof Pinotage Reserve 2013

6-8 Oktober 2015 om 19:00
Kaartjies R300 (vermaak, kos, wyn ingesluit)
Bespreek: 021 979 1911 / 083 406 0111