’n Groente sabzi

Sabzi verwys na 'n wye verskeidenheid Suid-Asiatiese groente-geregte, gewoonlik kerries of roerbraaigeregte. Dit moet nie verwar word met die Irannese kruie-gebaseerde geregte nie.

3 olie
½ teelepel komynsaad
1 eetlepel fyngekapte knoffel
½ eetlepel gemaalde vars gemmer
1 ui, fyngekapv 1 vars groen rissie, fyngekap
½ teelepel sout
¼ teelepel gemaalde borrie
1 teelepel garam masala
½ teelepel gemaalde koljander
1 teelepel gemaalde brandrissie
'n knypie uiepoeier
3 koppies oorskiet gaar groente (pampoen, wortels, broccoli, blomkool, kool, eiervrug en groenbone is geskik hiervoor), in happiegrootte stukkies
1 blikkie ingemaakte tamaties, gekap
1 teelepel fenegriek blare
2 eetlepels gekapte koljander
Rys of brood vir opdiening

Verhit 'n groot, swaarboom-braaipan met die olie en komynsaad.
Sodra die saad begin sis voeg jy die knoffel en gemmer by, dan die ui, groen brandrissie en sout. Braai tot die ui begin sag word, ongeveer 2 minute.
Voeg dan die borrie, garam masala, koljander, gemaalde brandrissie en uiepoeier by.
Voeg die gaar groente by, dan die tamatie en fenegriek en kook tot die tamatie opgebreek het, ongeveer 5 minute. Voeg 'n bietjie water of olie by indien nodig.
Proe vir sout en pas aan. Voeg die koljander by en eet saam met warm rys of brood.

Oosterse rysgereg / Riz à l'Orientale

Riz à l'Orientale is 'n Franse interpretasie van Oosterse rysgeregte. Die resep is genoeg vir 4 persone.

4 koppies warm gestoomde rys
1 koppie fyngekapte uie gaargemaak in botter en kruie van jou keuse
1 koppie blokkies eiervrug gesoteer in olie en knoffel
⅓ koppie gekapte okkerneute
12 kersietamaties, gehalveer
Sout en peper
Gekapte koljander

Met die warm rys in 'n groot kastrol, roer die uie, eiervrug, okkerneute en kersietamaties versigtig by.
Geur versigtig na smaak en skep in warm bakkies. Versier met die gekapte koljander.
Gee eetstokkies aan jou gaste.

Minestra

'n Minestra is 'n groente-gebaseerde Sisiliaanse sop.

3 eetlepels botter
½ ui, fyngekap
1 knoffelhuisie, fyngekap
½ teelepel sout
3 takkies tiemie
2 koppies gekombineerde gekapte groente (gaar of rou of 'n kombinasie. Of 'n paar skille en 'n paar stingels – enigiets werk, solank dit netjies gekap is)
4 koppies groenteaftreksel
1 koppie gaar stysels (bone, rys, klein pasta of aartappels)

Verhit 'n soppot. Voeg die botter, ui, knoffel en sout by en kook tot sag, ten minste 5 minute.
Voeg dan die kruie, groente en vloeistof by. Prut 20 minute.
Voeg die stysel by en prut vir 5 minute.
Proe vir sout en pas aan.

Aartappels met room en kaas / Gratin Jurassien

Aartappels wat in dik room gebak word, is heerlik saam met gebraaide lam, hoender, kalfsvleis, beesvleis of varkvleis. 'n Belangrike punt in hierdie resep is dat jy nooit die room heeltemal moet laat prut tydens die bakproses nie; dan sal dit nie skif nie.

4 eetlepels botter
1 kg kook-aartappels, in 3 mm skywe gesny
1 teelepel sout
⅛ teelepel peper
1 koppie gerasperde Cheddar
1¼ koppies room

Verhit die oond tot 150 grade Celsius.

Smeer 1 eetlepel botter in ’n oondskottel.
Rangskik lae aartappels daarin en geur elke laag met sout, peper, kaas en klontjies botter. Eindig met kaas en botterklontjies.
Gooi die room oor en bring dit stadig tot dit prut bo-op die stoof.
Plaas dan in die middelste vlak van die voorverhitte oond en bak vir 1 tot 1¼ uur, en reguleer die oond se hitte tydens die bakproses sodat die room nooit heeltemal borrel nie.
Die gratin is gaar wanneer die aartappels sag is en die room geabsorbeer het, en die bokant ligbruin is.

Gebraaide salotte

5 salotte, in dun skyfies gesny
Olie, genoeg om ’n swaarboompot met ongeveer 2,5 cm te bedek

Plaas die pot oor hoë hitte en bring die olie stadig tot borrelend.

Braai dan die salotte terwyl jy aanhoudend roer, totdat dit net goudbruin is - ongeveer 10 minute.
Syg deur en behou die olie, wat jy nou salot-olie kan noem.

Dreineer die salotte op 'n papierhanddoek tot koel.

Franse aartappelslaai / Pommes de terre à l'huile

Franse aartappelslaai word voorberei terwyl die gekookte, gesnyde aartappels nog warm is, sodat hulle die sous kan absorbeer. Die slaai kan warm of koud geëet word. Indien jy mayonnaise wil invou, kan jy so maak.

1 kg kook-aartappels
4 eetlepels droë witwyn, of 2 eetlepels droë wit vermout en 2 eetlepels bouillon
2 eetlepels wynasyn, of 1 eetlepel asyn en 1 eetlepel suurlemoensap
1 teelepel Dijon mosterd
¼ teelepel sout
6 eetlepels olyfolie
Peper
Opsioneel: 1 tot 2 eetlepels gekapte salotte of gekapte stingeluie
3 eetlepels gekapte gemengde kruie

Skrop die aartappels. Gooi dit in kokende soutwater en kook totdat die aartappels sag is wanneer dit met 'n klein messie deurboor word.
Dreineer die aartappels. Sodra hulle koel genoeg is om te hanteer, skil hulle en sny hulle in skywe. Plaas dit in ’n mengbak.

Gooi die wyn oor die warm aartappelskywe en meng dit baie versigtig. Laat dit vir 'n paar minute staan totdat die aartappels die vloeistowwe geabsorbeer het.

Klits die asyn, mosterd en sout saam tot die sout opgelos het.
Klits dan die olie drupsgewys by.
Geur na smaak en roer die opsionele salotte by.
Gooi die sous oor die aartappels en meng versigtig.

Sit dit voor terwyl dit nog warm is, of verkoel.
Versier met kruie voor opdiening.

Kammakreef / Kamma Kreef

1½ kg gaar stokvis, gevlok

Meng die volgende bestanddele tot ’n sous en meng dit dan met die vis:
1 koppie room
1 koppie mayonnaise
½ koppie tamatiesous
1 teelepel droë mosterdpoeier
2 teelepels worcestersous
1 ui, gerasper
Sout en peper na smaak

Garneer die individuele porsies met pietersielie. Granaat-pitte is ’n oulike alternatief vir garnering.

Die resep is genoeg vir 15 porsies as voorgereg.

Salade Niçoise

3 koppies geblanseerde groenbone
4 tamaties in kwarte gesny
1 koppie vinaigrette (Franse slaaisous)
1 kop blaarslaai, geskei, gewas, gedreineer en gedroog
3 koppies Franse aartappelslaai
1 koppie ingemaakte tuna-stukkies, gedreineer
½ koppie ontpitte swart olywe
3 hardgekookte eiers, in kwarte gesny
12 ingemaakte ansjovisfilette, gedreineer
3 eetlepels gemaalde vars groen kruie

Net voor opdiening, geur die bone en tamaties met 'n paar lepels vinaigrette. Gooi die slaaiblare in die slaaibak met ¼ koppie vinaigrette en plaas die blare om die rand van die bak. Rangskik die aartappels in die bodem van die bak. Versier met die bone en tamaties, en plaas die tuna-stukkies, olywe, eiers en ansjovis tussen hulle. Gooi die oorblywende sous oor die slaai, strooi die kruie oor en bedien.

Hierdie resep vir Salade Niçoise is genoeg vir 6 tot 8 persone.

Maroelabier

1 liter ryp maroelas
10 liter lou water
1,6 kg wit suiker
150 g rosyne
10 g aktiewe droë gis
10 ml kremetart
10 ml wynsteensuur

Sny 'n kruis in elke maroela. Kneus die vruggies liggies en voeg die water en suiker by. Roer dit totdat al die suiker opgelos is. Voeg die res van die bestanddele by. Giet die mengsel in 'n plastiek emmer met 'n deksel en laat dit 24 uur lank gis.

Syg die bier daarna deur en giet die filtraat in gesteriliseerde bottels. Moenie die bottels te vol maak nie. Net soos met die gemmerbier, plaas 2 tot 3 rosyne in elke bottel en draai die doppe liggies vas.

Laat die bier 'n dag of twee by kamertemperatuur gis voordat dit in die koelkas bewaar word.

Maroela bier resep